Дзень Салідарнасці ў Вашынгтоне
Нягледзячы на моцны дождж, 16 снежня ў Вашынгтоне, насупраць Амбасады Беларусі, адбылася акцыя салідарнасці з беларускімі палітзняволенымі, зніклымі апазіцыянерамі, з усімі, хто змагаецца за свабоду і дэмакратыю Беларусі. У акцыі прынялі ўдзел арганізацыя “Погляд”, фонд “Мы памятаем”, студэнты з Беларусі, прадстаўнікі беларускай дыяспары ў Амерыцы. Да мерапрыемства далучыліся і беларусы, якія жывуць у суседніх штатах, якіх не спыніла тое, што да месца правядзення акцыі трэба было дабірацца некалькі гадзін.
Былі запалены свечкі. Удзельнікі акцыі трымалі плакаты з партрэтамі Юрыя Захаранка, Віктара Ганчара, Анатоля Красоўскага, Дзмітрыя Завадскага і подпісам “Зніклыя і забітыя ў Беларусі”, а таксама расцяжкі з лозунгамі “Спыніць апошнюю дыктатуру ў Еўропе!”, “Прасігналь у падтрымку дэмакратыі ў Беларусі!” і іншыя.
Паводле сайта “Мы помнім”
V з’езд беларусаў свету МГА “ЗБС “Бацькаўшчына” адбудзецца ў ліпені 2009
18 лістапада адбылося пасяджэнне Малой Рады МГА “Згуртаванне беларусаў свету “Бацькаўшчына”, асноўным пытаннем, якога была падрыхтоўка да V з’езда беларусаў свету.18 лістапада адбылося пасяджэнне Малой Рады МГА “Згуртаванне беларусаў свету “Бацькаўшчына”, асноўным пытаннем, якога была падрыхтоўка да V з’езда беларусаў свету. Папярэдняя дата правядзення з’езда прызначана на 18–19 ліпеня 2009 года, канчаткова дата будзе зацверджана пасля кансультацыі з сябрамі Вялікай Рады, у якую ўваходзіць кіраўнікі і вядомыя дзеячы беларускіх арганізацый замежжа. Малая Рада, акрамя таго, акрэсліла тры варыянты тэмы з’езда.
Бясспрэчна адно – асноўнай праблематыкай з’езда будзе пытанне культурнай нацыянальнай ідэнтыфікацыі беларусаў, праблемы і захады па яе захаванні, як у метраполіі, так і ў дыяспары. Канчатковая тэма будзе зацверджана па выніках галасавання Вялікай Рады. На наступным пасяджэнні Малой Рады МГА “ЗБС “Бацькаўшчына”, якое адбудзецца ў студзені 2009 года, плануецца разглядаць праекты складу аргкамітэта па правядзенні з’езда, рабочых групаў, квотаў на вылучэнне дэлегатаў ды іншыя працоўныя моманты, неабходныя для годнага правядзення V з’езда беларусаў свету. Сваімі меркаваннямі і чаканнямі ад такой значнай падзеі ў жыцці беларусаў свету для Інфармацыйнага цэнтру “Бацькаўшчыны” падзяліліся некаторыя сябры Малой Рады.
Леанід Лыч, доктар гістарычных навук, прафесар: “Чакаю, што наступны з’езд беларусаў свету ўлічыць станоўчы досвед першых такіх форумаў і пройдзе на яшчэ большым і годным узроўні. І пажадана, каб адбылася гаворка, як у міжз’ездаўскі перыяд актывізаваць працу ў сферы беларускай культуры…”
Генадзь Бураўкін, паэт, грамадскі дзеяч: “Рады, што адбудзецца, бо гэта магчымасць сустрэцца і абмяняцца думкамі. Праблемы накопліваюцца ўсё больш і больш, і іх трэба абмяркоўваць. Буду рады, калі на з’ездзе з’явіцца болей моладзі, бо трэба аддаваць ужо ім перавагу, мы старэем, і нам на змену павінна прыходзіць маладое пакаленне…”
Алег Гардзіенка, гісторык, журналіст: “Мне хочацца, каб улады нашай краіны звярнулі ўсё ж такі ўвагу на нашу беларускую дыяспару. Каб гэты з’езд меў багатую колькасць прадстаўнікоў з заходніх краін, бо гэтая колькасць у асноўным за апошнія часы змяншаецца”. Паводле сайта ЗБС “Бацькаўшчына”.
