ЗША падоўжылі змякчэнне санкцый супраць двух прадпрыемстваў «Белнафтахіма»
Мінфін ЗША у чарговы раз падоўжыў рашэнне пра змякчэнне санкцый супраць двух беларускіх прадпрыемстваў канцэрна «Белнафтахім» – ААТ «Лакафарба» і «Полацк-Шкловалакно».
Як паведамляе афіцыйны сайт Мінфіна, рашэнне падоўжана па 31 траўня 2010 года.
У пазначаны перыяд амерыканскім грамадзянам дазволена супрацоўніцтва з двумя беларускімі прадпрыемствамі.
У той жа час уласнасць ААТ «Лакафарба» і «Полацк-Шкловалакно» застаецца заблакаванай у адпаведансці з ураднымі распараджэннямі № 13405. Грамадзянам ЗША забаронена праз ці пры пасярэдніцтве гэтых двух прадпрыемстваў набываць прадукцыю, паслугі і тэхналогіі ў іншых суб’ектаў гаспадарання, унесеных у спіс (маецца на ўвазе спіс прадпрыемстваў «Белнафтахіма», супраць якіх санкцыі дзейнічаюць зараз), перадае БелаПАН.
Нагадаем, у лістападзе 2007 года ЗША увялі эканамічныя санкцыі супраць канцэрна «Белнафтахім» у сувязі з парушэннем правоў чалавека ў Беларусі.
У сакавіку 2008 года, пасля таго, як улады Беларусі адмовіліся вызваляць былога кандыдата ў прэзідэнты Аляксандра Казуліна (на той момант – апошняга з шасці прызнаных міжнароднай супольнасцю палітвязняў), ЗША увялі санкцыі супраць усіх прадпрыемстваў, якія ўваходзяць у склад «Белнафтахіма». Менск і Вашынгтон адклікалі сваіх амбасадараў для кансультацый. Да сённяшнягя дня штаты абедзвюх амбасадаў скарочаны да мінімуму.
5 верасня 2008 года Мінфін ЗША на паўгады змякчыў эканамічныя санкцыі супраць двух ААТ – «Лакафарба» і «Полацк-Шкловалакно». У лютым 2009 года дзеянне гэтага рашэння было падоўжана да 1 ліпеня, затым – да 30 лістапада 2009 года.
Charter97.org
Transparency International: Беларусь зноў прызнаная карумпаванай краінай
Усясьветная грамадзкая арганізацыя Transparency International апублікавала штогадовы рэйтынг карумпаванасьці краінаў. Паводле яго, Беларусь прызнаная краінай з высокай ступеньню карумпаванасьці.
Рэйтынг вызначае ступень карумпаванасьці ў дзяржаўным апараце і сярод палітыкаў. Ён грунтуецца на аналізе апытаньняў і экспэртных ацэнках розных незалежных дасьледчых цэнтраў і ахоплівае 180 краінаў, шкала ацэнкі – ад нуля (высокі ўзровень карупцыі) да дзесяці (адсутнасьць ці мінімальная наяўнасьць карупцыі).
Пяцёрка лідэраў, дзе прысутнасьць карупцыі мінімальная, у гэтым годзе вызначылася наступным чынам: Новая Зэляндыя, Данія, Сынгапур, Швэцыя і Швэйцарыя. Пяцёрка краінаў з найгоршымі паказчыкамі – Ірак, Судан, М’янма, Аўганістан і Самалі.
Беларусь у рэйтынгу мае індэкс 2,4 і знаходзіцца на 139 месцы – разам з Банглядэш і Пакістанам. Паводле ацэнак, гэта вельмі высокая ступень карумпаванасьці. Аднак, трэба адзначыць, што ў параўнаньні з мінулым годам Беларусь палепшыла свае паказчыкі на 12 пазыцый (летась была на 151-м месцы).
Калі ў мінулым годзе горш за Беларусь з постсавецкіх краінаў былі толькі Азэрбайджан, Узбэкістан і Туркмэністан, дык цяпер дадаліся Расея і Ўкраіна і Кыргызстан. Прычым, калі Расея нават палепшыла паказчыкі на адну пазыцыю (за 147 месца перамясьцілася на 146), дык Украіна са 134 месца апусьцілася на 146-е.
З былых савецкіх рэспублік найлепшыя паказчыкі, як і летась, у краінаў Балтыі: Эстонія – 27 месца, Літва – 52, Латвія – 56.
Прыкметна, што Эстонія дзеліць 27 месца са Славеніяй, якая мае найлепшы індэкс сярод краінаў былога сацлягеру. Далей ідзе Вугоршчына – 46-е месца, Польшча – 49-е і Чэхія – 52-е (дзеліць разам зь Літвой). Як адзначае Transparency International , істотна палепшыла свае паказчыкі ў параўнаньні з папярэднімі гадамі Грузія – зараз яна на 66-м месцы.
Радыё Свабода
